Lyklaumsiting
– Amboð til at umsita talgildar samleikar
Tá ið ein borgari skal hava ein talgildan samleika útflýggjaðan, er neyðugt at møta persónliga og vísasamleikaprógv á staðnum. Borgarin fær tá ein byrjanarpakka við SIM-korti ella lyklakorti og ein faldara við nýtsluvegleiðing.
Tað er ikki gjørt av, hvar borgarin skal møta fyri at fáa talgilda samleikan, men hetta kundi t.d. verið í peningastovni, telebúð ella á einum almennum stovni.
Møguliga verður eisini gjørligt at biðja um ein talgildan samleika á netinum, og so verður byrjanarpakkin sendur við posti til adressuna, ið er skrásett í Landsfólkayvirlitinum. Ein slík skipan má góðkennast av Fíggjareftirlitinum, tí talgildi samleikin má lúka krøv um hvítvasking o.a. fyri at kunna nýtast í netbankanum.
Tað verður neyðugt at menna skipanir til lyklaumsiting til starvsfólkini, sum útflyggja talgilda samleikan. Starvsfólkini skulu eisini kunna steingja ein samleika, um borgarin hevur mist sítt SIM-kort burtur ella hevur mistanka um misnýtslu.
Ein heimasíða skal eisini mennast, sum greiðir frá talgilda samleikanum og loyvir brúkaranum sjálvum at umsita sín samleika, t.d. at broyta loyniorð og steingja samleikan.